Թուրքիան այս տարի կրկնապատկել է ռուսական նավթի ներմուծումը
Աննա Անտոնյան Օգոստոս 22, 2022
Թուրքիան այս տարի կրկնապատկել է ռուսական նավթի իր ներմուծումը, քանի որ երկու երկրները մտադիր են ավելի շատ համագործակցել բիզնեսի եւ հատկապես էներգետիկ առեւտրի ոլորտում, հաղորդում է Reuters-ը՝ վկայակոչելով Refinitiv Eikon-ի տվյալները:
Թուրքիան այս տարի ավելացրել է իր նավթի ներմուծումը Ռուսաստանից, այդ թվում՝ Urals եւ Siberian Light տեսակի նավթը, օրական ավելի քան 200.000 բարելով՝ 2021 թ. նույն ժամանակահատվածի 98.000 բարելի դիմաց:
Թուրքիան պատժամիջոցներ չի կիրառել Ռուսաստանի դեմ՝ հայտարարելով, որ շարունակում է կախված լինել ռուսական էներգակիրներից: Ռուսաստանի նախագահ Վլադիմիր Պուտինը եւ Թուրքիայի առաջնորդ Թայիփ Էրդողանը հանդիպել էին օգոստոսի սկզբին եւ պայմանավորվել ակտիվացնել գործարար համագործակցությունը։
Տվյալները ցույց են տվել, որ թուրքական խոշոր նավթավերամշակման Tupras եւ ադրբեջանական SOCAR STAR նավթավերամշակման գործարաններն այս տարի զգալիորեն մեծացրել են ռուսական Urals եւ Siberian Light նավթի սպառումը՝ միաժամանակ կրճատելով հյուսիսծովային, իրաքյան եւ արեւմտաֆրիկյան տեսակների գնումները:
Վերջին մի քանի տարվա ընթացքում STAR նավթավերամշակման գործարանը մեծացրել է նորվեգական Johan Sverdrup տեսակ նավթի եւ իրաքյան նավթի գնումները, որոնք որակով մոտ են Urals-ին, քանի որ ռուսական նավթը թանկացել է: Այս տարի ռուսական նավթի գները Brent հնացած էտալոնի համեմատ պատմական նվազագույնի է հասել, մինչդեռ հյուսիսծովային եւ իրաքյան նավթի գները բարելավվել են:
Ակնկալվում է, որ STAR նավթավերամշակման գործարանը 2022 թ. հունվար-օգոստոս ամիսներին Ռուսաստանից մոտ 90.000 բարել նավթ կգնի՝ նախորդ տարվա նույն ժամանակահատվածի 48.000 բարելի դիմաց, վկայում են Refinitiv Eikon-ի տվյալները:
Տվյալների համաձայն՝ Tupras-ի նավթավերամշակման գործարանները այս տարվա հունվարից օգոստոս ամիսներին Ռուսաստանից մոտ 111.000 բարել նավթ կգնեն՝ նախորդ տարվա նույն ժամանակահատվածի 45.000 բարելի դիմաց:
«Թուրքական նավթավերամշակման գործարանների ընտրությունն ակնհայտ ընտրություն էր, քանի որ ռուսական նավթ գնելու հարցում նրանք սահմանափակումներ չունեն»,- նշել է միջերկրածովյան նավթի շուկայում թրեյդերներից մեկը:
Նա հավելել է, որ Urals նավթի վերամշակման լավ մարժան նպաստել է թուրքական նավթավերամշակման գործարանների շահույթին։