Ռուսական խաղաղապահ զորակազմի առաքելությունը Ղարաբաղում ավելի քան պահանջված կմնա. ՌԴ ԱԳՆ
Աննա Անտոնյան Հոկտեմբեր 09, 2023
Ռուսական խաղաղապահ զորակազմի առաքելությունը Ղարաբաղում ավելի քան պահանջված կմնա։ Այս մասին ՌԲԿ-ի հարցազրույցում ասել է ՌԴ փոխարտգործնախարար Միխայիլ Գալուզինը։
«Իրավիճակը հողի վրա բավական դինամիկ է։ Ղարաբաղի շատ բնակիչներ ծանր որոշում են կայացրել հեռանալ այնտեղից։ Բայց միաժամանակ ես ելնում եմ այն բանից, որ ռուսական խաղաղապահ զորակազմի առաքելությունը կմնա ավելի քան պահանջված։
Ռուսական խաղաղապահ զորակազմը վիթխարի դեր է խաղացել, նախ՝ սեպտեմբերի 20-ի հրադադարի ձեռքբերման եւ Ղարաբաղի բնակիչներին մինչեւ արտագաղթը օգնության ցուցաբերման հարցում։ Մեր զինվորականներն ուղեկցել են տարհանված շարասյուներին՝ կարգ ու անվտանգություն ապահովելով։ Ցավոք, մեր վեց զինծառայողներ զոհվեցին իրենց ծառայողական պարտքը կատարելիս։ Մենք խորապես ցավում ենք դրա համար։
Ղարաբաղի հայերի եւ Ադրբեջանի իշխանությունների միջեւ շփումները նույնպես վարվում են ռուսական խաղաղապահ զորակազմի հրամանատարության ներկայացուցիչների մասնակցությամբ։ Շատ բարդ հարցերի համալիրը եւս լուծվում է ռուս խաղաղապահների աջակցությամբ։
Մեր զորակազմի դերը անհրաժեշտ է, եւ ես կարծում եմ, որ հետագայում եւս այն անհրաժեշտ կլինի։ Նախ՝ մնում է այն հարցը, որ իրենց հանգիստ զգան այն բնակիչները, որոնք ինչ-որ փուլում կորոշեն վերադառնալ։ Եվ խաղաղապահների առկայությունը այդ մարդկանց համար հանգստության լրացուցիչ գործոն կլինի։ Այնպես որ, ես չէի ասի, թե ռուսական խաղաղապահ զորակազմի գործունեությունը Ղարաբաղում սպառվել է։ Հարցը, թե ինչպիսին կարող էին լինել այդ զորակազմի այստեղ գտնվելու հետագա մոդալությունները, կքննարկվի եւ կորոշվի Մոսկվայի եւ Բաքվի միջեւ»,- ասել է նա։