Պաղեստինի ԱԳ նախարարը մեղադրում է Իսրայելին՝ Գազայի հիվանդանոցին «կանխամտածված» հարված հասցնելու մեջ
Աննա Անտոնյան Հոկտեմբեր 18, 2023
Պաղեստինի արտաքին գործերի նախարար Ռիադ Մալկին Իսրայելին մեղադրել է Գազայի հատվածում գտնվող Ալ-Ահլի հիվանդանոցը «կանխամտածված» ռմբակոծելու մեջ, հայտնում է AP-ն։
Մալկին, ելույթ ունենալով Սաուդյան Արաբիայում Իսլամական համագործակցության կազմակերպության 57 երկրների հանդիպման ժամանակ, նշել է, որ իսրայելցի զինվորականները երկու օր առաջ հարձակվել են նույն հիվանդանոցի վրա և նախազգուշացրել են այնտեղ գտնվող բժիշկներին։
Նրա խոսքով՝ միջազգային հանրությունը Իսրայելին թույլ է տալիս սպանություններ իրականացնել «ինքնապաշտպանության կարգախոսի» ներքո։ Նա ասել է, որ իսրայելական ռմբակոծությունները Գազայի հատվածում վերջին 11 օրվա ընթացքում 1300 երեխայի կյանք են խլել:
Երուսաղեմի անգլիկան եկեղեցու եպիսկոպոսը եւս նշել է, որ հիվանդանոցը տարհանման առնվազն երեք հրաման է ստացել իսրայելական զինվորականներից՝ հայտարարելով , որ անձնակազմը հրաժարվել է կատարել հրամանները:
Եպիսկոպոս Հոսամ Նահումը հայտարարել է, որ Իսրայելի պաշտպանության բանակը կիրակի օրվանից հեռախոսով նախազգուշացումներ է արել: Նա պնդում է, որ այդ օրը իսրայելական արկերը հարվածել են հիվանդանոցի երկու հարկերին։
«Մենք ռազմական փորձագետ չենք։ Մենք պարզապես ուզում ենք, որ մարդիկ տեսնեն, թե ինչ է կատարվում այստեղ և հույս ունենք, որ մարդիկ կգան այն եզրակացության, որ բավական է ինչքան շարունակվեց այս պատերազմը»,- ասել է նա։