Հայտնի է, թե հայաստանյան որ ընկերությունն է հայտնվել ԱՄՆ սանկցիաների ցանկում
Աննա Անտոնյան Ապրիլ 13, 2023
Ինչպես ավելի վաղ հայտնել էինք՝ ԱՄՆ առևտրի նախարարությունը արտահանման սահմանափակումներ է մտցրել տասը երկրից 28 իրավաբանական անձանց նկատմամբ, որոնց թվում կա Հայաստանում գրանցված մեկ ընկերություն։
Սանկցիաների ենթարկված ընկերության իրավաբանական անվանումն է, ըստ Առևտրի նախարարության, Tako LLC (Տակօ ՍՊԸ), որը գրանված է Երևանի Գարեգին Նժդեհի փողոցում։
Նշենք, որ Tako ՍՊԸ-ն և մնացած 27 ընկերությունները սանկցիաների ցանկում են հայտնվել, քանի որ ըստ ԱՄՆ իշխանությունների՝ շարունակել են արդեն իսկ սանկցիաների ցանկում ներառված ռուսական ընկերություններին ապրանքներ և ծառայություններ մատակարարել։
Հետաքրքրական է նաև, որ նախարարության պնդմամբ Tako ՍՊԸ-ն անվանափոխության է ենթարկվել և նախկինում կոչվել է Taco ՍՊԸ, որը ԱՄՆ սանկցիաների ներքո էր հայտնվել դեռ նախորդ տարվա սեպտեմբերին։ Taco ՍՊԸ-ն ռուսական Радиоавтоматика (Ռադիոավտոմատիկա) ընկերության գործընկերն է և ԱՄՆ իշխանությունների պնդմամբ ֆինանսական ու նյութական աջակցություն է տրամադրել վերջինիս։
Հիշեցնենք, որ բացի Taco ՍՊԸ-ից ԱՄՆ սանկցիաների ցանկում նախկինում (նախորդ տարվա նոյեմբերին) հայտնվել էր նաև ռուսական Миландр (Միլանդր) ընկերության՝ Հայաստանում գտնվող դուստր ձեռնարկությունը՝ Milur Electronics ՍՊԸ-ն՝ նույնանման մեղադրանքով։