Համբուրգում Հելոուինի ժամանակ անկարգություններ են տեղի ունեցել
Աննա Անտոնյան Նոյեմբեր 01, 2023
Համբուրգում երեքշաբթի՝ հոկտեմբերի 31-ին, Հելոուինի տոնակատարությունների ժամանակ մի քանի հարյուր հոգուց բաղկացած ամբոխը անկարգություններ է կազմակերպել, ինչի հետևանքով ոստիկանությունը ջրցան մեքենաներ է կիրառել, հաղորդում է dpa-ն։
Սկզբում քաղաքի հարավային թաղամասում հավաքվել էր մոտ 200 մարդ, հիմնականում երիտասարդներ, ապա նրանց թիվը հասել է 300-350-ի։ Հավաքվածները հրաժարվել են ցրվել՝ չնայած ոստիկանության բազմիցս պահանջներին, հայտնում է DW-ն։
Ոստիկանության տվյալներով՝ ճայթրուկներ են նետվել իրավապահների վրա, իսկ ոստիկանները փորձել են հետ մղել ամբոխին և կիրառել ջրցան մեքենաներ: Բացի այդ, ձերբակալություններ են կատարվել, գրում է dpa-ն։ Տուժածների մասին տեղեկություններ չկան։ Քաղաքի մեկ այլ հատվածում մոտ 50 երիտասարդներ ճայթռուկներ են արձակել, վնասել խանութների ցուցափեղկերն ու այրել աղբի տարաները։