Եվրոպական կողմը փորձում է ապահովել ադրբեջանցի հանցագործների փոխանակումը հայ ռազմագերիների դիմաց. Սիրանուշ Սահակյան
Աննա Անտոնյան Մայիս 16, 2023
Եվրոպական կողմը, հաշվի առնելով ադրբեջանական շահերը, փորձում է ապահովել Հայաստանի սահմանը հատած ադրբեջանցիների փոխանակումը հայ ռազմագերիների դիմաց: Այս մասին զրույցում ասաց Միջազգային եւ համեմատական իրավունքի կենտրոնի նախագահ Սիրանուշ Սահակյանը:
Հիշեցնենք, որ մայիսի 14-ին Բրյուսելում Փաշինյան-Միշել-Ալիեւ եռակողմ հանդիպումից հետո Եվրոպական խորհրդի նախագահ Շառլ Միշելը հայտարարել է, որ առաջիկա շաբաթներին ազատ կարձակվեն եւս մի քանի կալանավորվածներ։ Նա նաեւ ասել էր. «Ես նաև ընդգծել եմ փոխըմբռնման պահպանման անհրաժեշտությունը այն հարցի շուրջ, որ զինվորները, որ պարզապես մոլորվել ու անցել են մյուս կողմը, նախկինի պես ազատ կարձակվեն արագացված ընթացակարգով»:
Սիրանուշ Սահակյանի խոսքով՝ այդտեղ կա փաստերի սխալ ներկայացում, եւ, ըստ էության, ներկայացվել է ադրբեջանական տեսակետը միակողմանի.
«Հետեւում չկան փաստեր, եւ արտացոլված չէ հայկական դիրքորոշումը: Չգիտեմ՝ ինչու հայկական դիրքորոշման հետ համադրելով չի դուրս բերվել փաստակազմը եւ վերջնական վարկածը: Գուցե տեղյակ չեն հայկական դիրքորոշումից կամ տեղյակ լինելով, ցանկալի է եղել հենվել ադրբեջանական տեսակետի վրա, ինչեւիցե կլասիկ հանցագործները ներկայացվում են որպես մոլորյալ զինծառայող այն պարագայում, երբ այդ զինծառայողներից առնվազն մեկը նաեւ տեսանյութ է հրապարակել եւ իրենց իսկ կողմից կատարված հանցագործությունները հիմնավորվում են բազմաթիվ ապացույցներով: Որպես կանոն՝ եթե մոլորյալ զինծառայողները հայտնվում են եղանակային կամ այլ պայմանների ուժով այլ պետության զինված ուժերի հսկողության ներքո, թշնամական բռնությամբ զուգորդված գործողություններ չեն կատարում: Այս պարագայում տեսնում ենք, որ դիտավորությամբ որոշակի գործողություններ են իրականացվել եւ ոտնձգել են այնպիսի կարեւոր արժեքների դեմ, ինչպիսին կյանքն է»:
Նա ընդգծեց, որ այդ թեզը աջակցելու է «հայ ռազմագերիների փոխանակում մոլորյալների հետ» օպերացիային. «Կարծում եմ՝ քանի որ նրանք շատ փափուկ գործիքներով են աշխատում Ադրբեջանի հետ եւ ռազմագերիների հայրենադարձման հարցում տեղաշարժ չեն ապահովել վերջինե 6 ամիսների ընթացքում: Եվրոպական կողմը, հաշվի առնելով ադրբեջանական շահերը ռազմագերիների մասով, փորձում է ապահովել նրանց փոխանակումը ռազմագերիների դիմաց:
Մենք ունենք նախադեպ նախ նոյեմբերի 9-ի հայտարարության մեջ տրվեցին այնպիսի ձեւակերպումներ, որ փոխանակումը տարածվեց ոչ միայն ռազմագերիների, այլ նաեւ այլ հիմքերով անազատության մեջ պահվողների նկատմամբ: Ցմահ ազատազրկման դատապարտված երկու ադրբեջանցիները, որոնք պատիժ էին կրում Շուշիում, փաստացիորեն այդ փոխանակման մաս դարձան, եւ կան նախադրյալներ, որպեսզի երկու ադրբեջանցիների վերադարձի դիմաց հնարավոր լինի լուծել սահմանափակ թվով հայ ռազմագերիների վերադարձի հարց՝ եվրոպական միջնորդությամբ»: