Եվրոպական հիմնադրամներն ավելի քան կրկնապատկել են պաշտպանական ընկերություններում ներդրումները. FT

Աննա Անտոնյան Սեպտեմբեր 02, 2024

Եվրոպական հիմնադրամներն ավելի քան կրկնապատկել են իրենց ներդրումները պաշտպանական բաժնետոմսերում Ուկրաինա Ռուսաստանի լայնամասշտաբ ներխուժման սկզբից ի վեր: Այս աճն արտացոլում է եվրոպական երկրների նոր առաջնահերթությունները՝ ամրապնդելու իրենց պաշտպանական արդյունաբերությունը` Ռուսաստանի Դաշնության սպառնալիքների ֆոնին, հայտնում է Financial Times-ը։

Ոլորտում ներդրումները 2022 թվականի առաջին եռամսյակում 3,2 միլիարդ եվրոյից աճել են մինչև 7,7 միլիարդ եվրո, համաձայն Morningstar Direct-ի վերջին տվյալների:

Նշվում է, որ ներդրումների աճը մեծապես պայմանավորված է պաշտպանական ընկերությունների բաժնետոմսերի գների աճով, որոնք հաջորդել են Ուկրաինայի վրա Ռուսաստանի Դաշնության լայնածավալ հարձակմանը։

«Ուկրաինայում տիրող իրավիճակն իսկապես առաջին պլան է մղել այս գաղափարը. կարո՞ղ ենք մենք իսկապես պաշտպանել մեզ»,- հրապարակմանն ասել է Իրավական և ընդհանուր ներդրումների կառավարման կազմակերպության գլխավոր ներդրումային տնօրեն Սոնյա Լաուդը։

Հաղորդվում է, որ ներդրողների մի զգալի մասը համաձայն է կառավարությունների դիրքորոշման հետ՝ պնդելով պաշտպանական արտադրողներին աջակցելու դրական սոցիալական ազդեցությունը այսօրվա աշխարհաքաղաքական իրավիճակում։ Սակայն, ինչպես նշում է հրապարակումը, քննարկումները դեռ շարունակվում են այն հարցի շուրջ. կարո՞ղ են արդյոք պաշտպանական ընկերությունները համարվել ESG ներդրումների մաս՝ ուղղված բնապահպանական, սոցիալական և կառավարման չափանիշներին:

Եվրոպական ESG հիմնադրամների թիվը, որոնք պահում են պաշտպանական բաժնետոմսերի ավելի քան 5%-ը, վերջին երկու տարվա ընթացքում 22-ից հասել է 66-ի:

Հրատարակությունը մատնանշում է, որ այս հատվածում ակտիվների մասնաբաժինը մնում է աննշան (ընդհանուր 1,5 տրլն եվրո ակտիվների 1%-ից պակաս)։ Սակայն, չնայած դրան, պաշտպանական ոլորտը գնալով ավելի գրավիչ է դառնում ներդրողների համար։

FT-ը գրում է, որ MSCI Europe Defense Industry Index-ը 2022 թվականի սկզբից բարձրացել է 1,8 անգամ՝ ավելի մեծացնելով ոլորտի գրավչությունը։ Նշվում է, որ Մեծ Բրիտանիայի և Եվրոպայի քաղաքական գործիչները ներդրողներին կոչ են անում շարունակել աջակցել պաշտպանական ոլորտին։

Հաղորդվում է նաև, որ պաշտպանության ոլորտում ներդրումներն աճում են ոչ միայն Եվրոպայում։ Հայտնի է, որ ԱՄՆ-ում աճում են նաև ներդրումներն այս ոլորտում ESG հիմնադրամների շարքում։ 2024 թվականի երկրորդ եռամսյակում դրանք հասել են 1,2 միլիարդ եվրոյի։

Կիսվել