ԱԺ նախագահը ստացել է պատգամավոր Վիլեն Գաբրիելյանի՝ մանդատից հրաժարվելու դիմումը
Աննա Անտոնյան Ապրիլ 01, 2025
Հայաստանի Ազգային ժողովի նախագահ Ալեն Սիմոնյանը ստացել է «Քաղաքացիական պայմանագիր» խմբակցության պատգամավոր Վիլեն Գաբրիելյանի՝ մանդատից հրաժարվելու դիմումը։
Այս մասին հայտնեց ՀՀ ԱԺ նախագահի մամուլի խոսնակ Մովսես Հարությունյանը։
«Քաղաքացիական պայմանագիր» խմբակցության պատգամավոր Վիլեն Գաբրիելյանն ավելի վաղ հայտնել էր մանդատից հրաժարվելու մասին։ Նրա որոշումը կապված էր մարտի 30-ին Գյումրիում ավագանու արտահերթ ընտրությունների ընթացքում իր պահվածքի հետ։ Պատգամավորն այդ օրը աչքի էր ընկել ագրեսիվ պահվածքով, հայտնվել մի քանի միջադեպերի կիզակետում։ Տարածված տեսանյութերից երևում է, որ պատգամավորն այդ օրը գտնվել է ոչ սթափ վիճակում։
Վիլեն Գաբրիելյանը ներողություն է խնդրել իր պահվածքի համար ու հայտարարել մանդատը վայր դնելու որոշման մասին։