Անցյալում շատ հանցագործություններ չէին բացահայտվում, նույնիսկ չէին արձանագրվում, դրանք լատենտային հանցագործություններ էին, որոնք չէին հանրայնացվում։ Կառավարության նիստից հետո լրագրողների հետ ճեպազրույցում հայտարարեց արդարադատության նախարար Գրիգոր Մինասյանը` բացահայտումների ավելացմամբ պայմանավորելով հանցագործությունների թվի աճը։
«Քանի որ համակարգը սկսում է լավ աշխատել, բնականաբար հանցագործություններն ավելի շատ են ֆիքսում։ Այսինքն` եթե նախկինում կոռուպցիայի դեպքեր չէին բացահայտվում, չի նշանակում, որ կոռուպցիա չկար, ուղղակի ոչ մեկ դա չէր արձանագրում, իսկ հիմա ես ուրախանում եմ, որ դրա արձանագրումն ավելի շատ է»,– նշեց Մինասյանը։
Պատասխանելով լրագրողի այն հարցին, թե արդյոք նախկինում Սերժ Սարգսյանի օրոք, երբ ինքը որպես ՀՀԿ անդամ նիստերի էր մասնակցում, կոռուպցիոն դեպքեր արձանագրում էր, թե ոչ, Մինասյանը նշեց` նախկինում արձանագրող կամ չինովնիկ չի եղել։
«Եթե լինում են մտահոգություններ, միշտ բարձրաձայնել եմ թե հարցազրույցներով, թե քննարկումների ժամանակ»,– նշեց Մինասյանը։
Հիշեցնենք՝ մայիսի 3-ին ՀՀ գլխավոր դատախազ Աննա Վարդապետյանն ԱԺ-ում հայտարարել էր, որ 2022 թ.-ին նախորդ տարվա համեմատությամբ հանցավորության դեպքերը Հայաստանում աճել են 7367-ով կամ 24.4 %-ով։