Ադրբեջանա-հայկական կարգավորման գործընթացի անկյունաքարը պետք է տնտեսությունը լինի. Բաքվում ՌԴ դեսպան
Աննա Անտոնյան Փետրվար 10, 2023
Ադրբեջանա-հայկական կարգավորման հարցում կարելի է առանձնացնել երեք հիմնական ուղղություն։ Այս մասին ասել է Ադրբեջանում ՌԴ դեսպան Միխայիլ Բոչարնիկովը haqqin.az-ի հարցազրույցում։
«Դրանցից մեկը տնտեսական եւ տրանսպորտային կապերի վերականգնումն է։ Մյուս երկուսը՝ սահմանազատումն ու խաղաղության համաձայնագրի կնքումը։ Ասել, թե բանակցային գործընթացի այս երեք ուղղությունները սերտորեն կապված չեն միմյանց, կարծում եմ, ճիշտ չէր լինի։ Բայց միեւնույն ժամանակ ուղղություններից մեկում հապաղելը կարող է բացասաբար անդրադառնալ մյուս բանակցությունների վրա։ Այժմ, ըստ երեւույթին, հենց դա էլ տեղի է ունենում։ Բայց նորից կրկնեմ. խաղաղության պայմանագիրը քաղաքական հարց է։ Ինչ-որ չափով քաղաքական կարելի է համարել նաեւ սահմանազատման թեման։ Իսկ ահա ճանապարհների եւ երթուղիների ապաշրջափակումը զուտ տնտեսություն է։ Կարծում եմ՝ ընդհանուր առմամբ գործընթացի համար վատ չէր լինի վերանայել առաջնահերթությունների համակարգը եւ անկյունաքար համարել հենց տնտեսությունը»,- ասել է դեսպանը։