Կամավոր հիմունքներով պարտադիր զինծառայություն անցնող կանայք ամսական որոշակի գումար են ստանալու։ Այսօր Ազգային ժողովում պաշտպանության և անվտանգության հարցերի մշտական հանձնաժողովի նիստում հայտնեց ՀՀ պաշտպանության նախարար Սուրեն Պապիկյանը։

«Այս պահին նախատեսված է զինծառայողին հասանելիք վճարը, բայց քննարկում ենք նաև այդ վճարի չափը փոփոխել` հաշվի առնելով իգական սեռի համար առաջին անհրաժեշտության պարագաների ձեռքբերումը, որը կլինի որոշակի զամբյուղի սահմանում»,– նշեց նախարարը։

Պապիկյանի խոսքով` 6-ամսյա ծառայությունից հետո կապը զինծառայության հետ, այսպես ասած, չի ավարտվում։ Այդ ծառայությունը հիմք է դառնում, որ նրանք համարվեն լիիրավ և լիարժեք պահեստազոր, ինչպես զինապարտ տղամարդիկ։

Պապիկյանը հիշեցրեց, որ զորակոչված իգական սեռի զինծառայողներն առանց վիճակահանության նշանակվելու են զինվորական զորամաս և ամբողջ ծառայությունն անցկացնելու են այդ զորամասում։ Նա տեղեկացրեց, որ այդ նպատակով ընթանում է առանձին զորամասի տեսքով կանանց գումարտակի ձևավորման գործընթացը, որի վարչակազմը լինելու են պայմանագրային զինծառայության մեջ գտնվող կանայք։

«Աշխատանքներն արդեն սկսվել են, վաղուց նախորոշված է այն զորամասի տարածքը, որի վրա հիմա կցված է կանանց վաշտը, որը հիմքն է դառնում կանանց գումարտակի, հետագայում` կանանց գնդի համար։ Հենց այդ գումարտակի զինծառայողներն էլ հանդիսանալու են վարչակազմը»,– նշեց նախարարը։

«Պաշտպանության մասին» և «Զինվորական ծառայության և զինծառայողի կարգավիճակի մասին» օրենքներում նախատեսվող լրացումներով և փոփոխություններով` կանանց համար պարտադիր զինվորական ծառայության ժամկետ է սահմանվելու 6 ամիս։ 6 ամիս անց զորացրվելիս կանայք կստանան 1 մլն դրամ պատվո վճար։ Իսկ առողջության պատճառով զինծառայությունից վաղաժամկետ ազատվելու դեպքում 1 մլն դրամը կբաժանվի 6 ամիսների վրա, և պատվո վճարը կհաշվարկվի ծառայության ամիսների հանրագումարի չափով։

«Եթե լինեն նման ուրախալի դեպքեր, միայն կողջունենք»,– ասաց Պապիկյանը։

Պապիկյանի խոսքով` ինքն այն մարդը չէ, որ պետք է խոսի գենդերային հավասարության մասին, բայց Հայաստանում իգական սեռի յուրաքանչյուր քաղաքացի պետք է տղամարդկանց հավասար իրավունքներ ունենա, այդ թվում` հայրենիքը պաշտպանելիս։