Երևանում տրանսպորտից օգտվելիս չվճարելու դեպքում 15 հազար դրամ տուգանք սահմանելու նախագիծն ընդունվեց
Աննա Անտոնյան Հուլիս 03, 2025
ՀՀ Ազգային ժողովն ընդունեց Երևանում հասարակական տրանսպորտից օգտվելիս ուղեվարձը չվճարելու դեպքում վարչական տույժ սահմանելու նախագիծը։
Նախագծին կողմ քվեարկեց 59 պատգամավոր, դեմ էր 26-ը, ձեռնպահ՝ 1-ը։
Ազգային ժողովը քննարկում է ուղեվարձը չվճարելու համար նախատեսված տուգանքների նախագիծը։
Նախագիծը ներկայացնելիս տարածքային կառավարման և ենթակառուցվածքների փոխնախարար Արմեն Սիմոնյանը մանրամասներ էր հայտնել, թե ինչպես է լինելու տուգանելու գործընթացը։
«Եթե քաղաքացին օգտվել է ոչ իր կողմից ձեռք բերված կամ արտոնություն ունեցող անձի կրիչը կրող քարտից կամ արտոնությունից ընդհանրապես, ապա այս պարագայում սահմանվում է 15-ապատիկի չափով, այսինքն՝ 15 հազար դրամ, և 3-ապատիկի չափով է սահմանվում, եթե ունի նման հնարավորություն, արտոնություն, սակայն չի վավերացրել կրիչը տրանսպորտային միջոցում, այսինքն՝ տրանսպորտային միջոց բարձրանալիս ձեռք է բերել համապատասխան իրավունք, սակայն այդ իրավունքը չի վավերացրել», - ասել էր ՏԿԵ փոխնախարարը։
Առաջարկվում է տուգանք. 3 հազար դրամ՝ տրանսպորտ նստելուց հետո տոմսը կամ կրիչը չվավերացնելու դեպքում, 10 հազար դրամ՝ չվճարելով օգտվելու դեպքում, 15 հազար դրամ՝ այլ անձի համար նախատեսված արտոնությունն օգտագործելով վճարելու դեպքում։