Ոսկու գինը պատմական ռեկորդ է սահմանել՝ գերազանցելով 4000 դոլարը
Աննա Անտոնյան Հոկտեմբեր 08, 2025
Չորեքշաբթի օրը ոսկու գինը առաջին անգամ պատմության մեջ գերազանցել է 4000 դոլարի սահմանը՝ հասնելով 4017.16 դոլարի մեկ ունցիայի համար։
Գնի բարձրացումը պայմանավորված է տնտեսական և աշխարհաքաղաքական անորոշության պայմաններում ներդրողների կողմից ապահով ակտիվների որոնմամբ, ինչպես նաև ԱՄՆ Դաշնային պահուստային համակարգի կողմից տոկոսադրույքների իջեցման սպասումներով։
Ոսկին այս տարվա ընթացքում գրանցել է շուրջ 53% տարեկան աճ, դառնալով 2025 թվականի լավագույն ցուցանիշ ունեցող ակտիվներից մեկը։
Վերլուծաբանների գնահատմամբ՝ շարունակական բարձրացմանը նպաստում են պետական պարտքի աճը, կենտրոնական բանկերի կողմից ոսկու կայուն գնումները և դոլարի թուլացումը։
Փորձագետները նշում են, որ շուկայում գերակշռում է վստահությունը ոսկու նկատմամբ, իսկ որոշ ներդրողներ արդեն սպասում են հաջորդ նշաձողին՝ 5000 դոլարին մեկ ունցիայի համար, թեև կարճաժամկետ շահույթ ամրագրելու միտումները կարող են որոշակի փոփոխություններ առաջացնել գնի դինամիկայում։
1 ունցիան (ոսկու և այլ թանկարժեք մետաղների չափման համար օգտագործվող տերմին) 31.1035 գրամ է։