Ստամբուլում ձերբակալվել է ընդդիմադիր քաղաքապետ Էքրեմ Իմամօղլուն

Աննա Անտոնյան Մարտ 19, 2025

Թուրքիայի իշխանությունները ձերբակալել են Ստամբուլի ընդդիմադիր քաղաքապետ Էքրեմ Իմամօղլուին։

Ոստիկանության իրականացրած գործողությունը կապված է կոռուպցիոն հանցագործությունների հետաքննության հետ։ Ավելի վաղ խուզարկություն էր կատարվել քաղաքապետի տանը։

Բերման են ենթարկվել քաղաքապետը, նրա մամուլի քարտուղարը և քաղաքապետարանի մոտ 100 այլ աշխատակից:

Իմամօղլուն «կալանավորվել է և ներկայումս գտնվում է ոստիկանության գլխավոր վարչությունում»։

Ստամբուլի համալսարանը գլխավոր դատախազության հարցումից հետո երկուշաբթի օրը չեղարկել է Իմամօղլուի համալսարանական դիպլոմը։

Իրավապահների կասկածը հարուցել էին Իմամօղլուի՝ Հյուսիսային Կիպրոսի համալսարանից Ստամբուլ տեղափոխվելիս հնարավոր խախտումները, քանի որ կղզու ուսումնական հաստատությունն այն ժամանակ պաշտոնապես ճանաչված չէր Թուրքիայի կողմից։ Ինքը՝ Իմամօղլուն, ցուցմունք է տվել այդ առնչությամբ:

Երկրի օրենսդրության համաձայն՝ նախագահի թեկնածու կարող է դառնալ միայն բարձրագույն կրթություն ունեցողը։

Կիսվել