Ռուսաստանն ու ԱՄՆ-ն Աբու Դաբիում փոխանակել են գերիներին
Աննա Անտոնյան Ապրիլ 10, 2025
Ռուսաստանն ու Միացյալ Նահանգները հինգշաբթի՝ ապրիլի 10-ին Աբու Դաբիում բանտարկյալներ են փոխանակել:
Լրագրողները պարզաբանել են, որ Արթուր Պետրովը, որին ԱՄՆ-ն մեղադրել է Մոսկվային պատժամիջոցները շրջանցելուն օգնելու մեջ, ազատ է արձակվել։
ԱՄՆ պետքարտուղար Մարկո Ռուբիոն հաստատել է, որ ռուսական կողմն ազատ է արձակել Քսենիա Կարելինային, որը Ռուսաստանում 12 տարվա ազատազրկման էր դատապարտվել պետական դավաճանության համար։
«Ամերիկուհի Քսենիա Կարելինան Միացյալ Նահանգներ մեկնող ինքնաթիռում է։ Նա ավելի քան մեկ տարի սխալմամբ ձերբակալված էր Ռուսաստանում, և նախագահ Թրամփը ապահովեց նրա ազատ արձակումը: Միացյալ Նահանգների նախագահը կշարունակի աշխատել բոլոր ամերիկացիների ազատ արձակման համար», - գրել է Ռուբիոն իր X-ում:
ՌԴ Անվտանգության դաշնային ծառայությունն էլ հաստատել է լուրը եւ հայտնել, որ Արթուր Պետրովն արդեն հայրենիքում է։