Ռուսաստանի հայերի միությունը պատերազմի օրերին հայրենիքի կողքին էր
Աննա Անտոնյան Մայիս 15, 2021
2020 թվականի Արցախյան պատերազմը վերջին շրջանի, թերևս, ամենասոսկալի իրադարձությունն էր հայ ժողովրդի կյանքում։ Այն սթափության ու համախմբման կոչ էր Հայաստանում և սփյուռքում ապրող յուրաքանչյուր հայի համար։ Ռուսաստանի հայերի միություն հասարակական կազմակերպությունում նույնպես մեկտեղվեցին բոլոր հնարավորություններն ու ռեսուրսները՝ սատարելու և աջակցելու հայրենիքին։ Օր առաջ հարկավոր էր կենտրոնացել բոլոր միջոցներն ու ուժերը։ Հենց սեպտեմբերի 27-ին ձևավորվեց համապատասխան շտաբ, ստեղծվեցին 24 ժամյա ռեժիմով աշխատող խմբեր, որտեղ սկսեցին համակարգվել և ծրագրվել անելիքները։ Միության նախագահ Արա Աբրահամյանի ղեկավարությամբ կատարվեց աշխատանքի բաժանում՝ ուղղորդված ճյուղավորմամբ՝ աջակցություն Հայաստանի և Արցախի զինված ուժերին, փախստականներին, համագործակցում Ռուսաստանի Դաշնության կառավարության հետ, մասնակցություն միջէթնիկական հարաբերությունների կայունացմանը, մեդիապատերազմի կանխում։ Սեպտեմբերի 29-ին արդեն Ստեփանակերտ քաղաք հասավ մեծաքանակ հումանիտար օգնություն։ Դա ապացույցն էր այն բանի, որ Ռուսաստանի հայերի միություն հասարակական կազմակերպությունը հայրենիքի կողքին է ոչ միայն բարոյապես, այլ նաև նյութապես։ Աջակցման այս մեծամասշտաբ ծրագրին իրենց մասնակցությունը բերեցին Ռուսաստանում հայերի միության բոլոր մասնաճյուղերը՝ եղբայրական ձեռք մեկնելով հայրենակիցներին։