Մանանա Ասլամազյանին վրաերթի ենթարկած երիտասարդը Tesla-ն վարել է առանց վարորդական իրավունքի
Աննա Անտոնյան Օգոստոս 31, 2022
25-ամյա երիտասարդը, որը Երևանի Թումանյան փողոցում «Tesla»-ով մահացու վրաերթի է ենթարկել «Ինտերնյուսի» նախկին գլխավոր տնօրեն Մանանա Ասլամազյանին, ավտոմեքենան վարել է` չունենալով համապատասխան կարգի վարորդական իրավունքի վկայական։ Տեղեկությունը հայտնում է ՀՀ քննչական կոմիտեի մամուլի ծառայությունը։
Հայտնել ենք, որ օգոստոսի 30-ին՝ ժամը 17:30-ի սահմաններում, վրաերթ է տեղի ունեցել Թումանյան փողոցում։ Տուժածին հիվանդանոց է տեղափոխել վրաերթի ենթարկած «Tesla» մակնիշի ավտոմեքենայի վարորդը։ Մանանա Ասլամազյանի կյանքը, սակայն, փրկել չի հաջողվել։
«ՀՀ քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնում ՀՀ քրեական օրենսգրքի 342-րդ հոդվածի 4-րդ մասով նախաձեռնվել է քրեական վարույթ՝ Երևան քաղաքի Թումանյան փողոցում տեղի ունեցած մահվան ելքով վրաերթի հանգամանքները պարզելու ուղղությամբ»,- ասվում է ՔԿ-ի հաղորդագրության մեջ:
Նշենք, որ 342-րդ հոդվածի 4-րդ մասով նախատեսված հանցանքը հետևյալն է` ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման անվտանգությունն ապահովող կանոնները խախտելը, որը կատարվել է հարբած (ոչ սթափ վիճակում) կամ համապատասխան տրանսպորտային միջոց վարելու իրավունք չունեցող անձի կողմից։
«Tesla»-ի վարորդը ձերբակալվել է:
Կատարվում է նախաքննություն:
«Tesla»-ի վարորդը ձերբակալվել է:
Կատարվում է նախաքննություն: