«Մայիսի 28-ը հարության և վերածնման օր է, որը մարմնավորում է մեր ժողովրդի կենսունակությունն ու հաղթանակի աննկուն կամքը» Արա Աբրամյան
Աննա Անտոնյան Մայիս 28, 2021
Մայիսի 28․․․ Առաջին հանրապետության օր․․․
Հայաստանի պետականության վերականգնման, բոլորիս համար վերածնման եւ վերհառնումի խորհրդանշական ամսաթիվ։ Այս օրը մարմնավորում է մեր կենսունակությունն ու հաղթանակի աննկուն կամքը։
Ճակատագրի հարվածների ու մեծ կորուստների գնով հայ ժողովրդին հաջողվեց նվաճել սեփական պետություն ունենալու իրավունքը։
Առաջին հանրապետության, ինչպես նաև Խորհրդային Հայաստանի և դրան հաջորդած անկախ Հայաստանի Հանրապետության ստեղծման պատմությունն օրինակ է, թե ինչպես մի ողջ ժողովուրդ, հաղթահարելով ամենադժվար փորձությունները, կարող է հառնել մոխրից և ներկայանալ աշխարհին որպես մտավոր մեծ ներուժ ունեցող ազգ:
Այսօր, ավելի քան հարյուր տարի անց, տասնամյակների վրիպումների և ձախողումների պատճառով մեր անկախությունը դարձյալ վտանգված է ոչ միայն արտաքին բռնաճնշման, այլ նաև ներկա իշխանությունների կողմից հրահրվող կործանարար գործընթացների հետևանքում:
Բայց ես համոզված եմ, որ հավատն առ Աստված և հավատը մեր սեփական ուժի նկատմամբ, Արցախի՝ մեր հայրենիքի պաշտպանության համար ընկած մեր քաջ զավակների հիշատակը և մեր հաղթական պատմությունը վստահություն կներշնչեն, թույլ կտան մեզ միավորվել և վերջնականապես ազատվել վերջին երեք տարիների կործանարար ժառանգությունից: Մենք կկարողանանք վերականգնել մեր արժեքները, ամրապնդել մեր պետությունը, հնարավորություն ընձեռել հային ապրել և ստեղծագործել սեփական տանն ու հպարտանալ սեփական հայրենիքի նվաճումներով:
Մեր ներկան և ապագան կախված են մեզնից և միայն մեզնից՝ մեր գործողություններից, գաղափարներից և յուրաքանչյուրիս ձայնից:
Արա Աբրամյան