Lufthansa-ի ցամաքային անձնակազմը գործադուլ է հայտարարել. չեղարկվել է ավելի քան 1000 չվերթ
Աննա Անտոնյան Հուլիս 27, 2022
Deutsche Lufthansa-ի ցամաքային անձնակազմը չորեքշաբթի գործադուլ է հայտարարել, ինչի հետեւանքով ավելի քան 1000 չվերթ է չեղարկվել եւ սրվել է ճանապարհորդությունների խափանումներն ամառային զբոսաշրջային ծանրաբեռնված սեզոնին, հաղորդում է Reuters-ը:
Verdi արհմիությունը գործադուլի կոչ է արել հինգշաբթի տեղական ժամանակով ժամը 06:00-ն՝ պահանջելով 9.5 տոկոսով բարձրացնել շուրջ 20 հազար աշխատողների աշխատավարձերը:
Այս քայլը ստիպել է Lufthansa-ին չորեքշաբթի չեղարկել գրեթե բոլոր չվերթները Ֆրանկֆուրտում եւ Մյունխենում:
Գործադուլներն ու անձնակազմի պակասն արդեն ստիպել են ավիաընկերություններին, այդ թվում՝ Lufthansa-ին, հազարավոր չվերթներ չեղարկել եւ ժամերով հերթեր են առաջացրել խոշոր օդանավակայաններում՝ հիասթափեցնելով հանգստացողներին, ովքեր ցանկանում են ճանապարհորդել COVID-19-ի կապակցությամբ չվերթների արգելքից հետո:
Հունիսին Verdi-ն պահանջել էր բարձրացնել աշխատավարձը 9.5 տոկոսով կամ առնվազն 350 եվրո ամսական 12 ամսվա ընթացքում մոտ 20.000 աշխատողի համար, ովքեր, ըստ դրա, տուժել են գնաճից եւ գերբեռնված են օդանավակայանների անձնակազմի պակասի պատճառով:
Lufthansa-ն առաջարկել է ամսական 150 եվրոյի ավելացում մինչեւ այս տարվա վերջ եւ եւս 100 եվրո՝ 2023 թվականի սկզբից, գումարած 2 տոկոս աճ 2023-ի կեսերից՝ կախված ընկերության ֆինանսական արդյունքներից:
Արհմիությունը մերժել է առաջարկը՝ հայտարարելով, որ դա բավարար չէ թռիչքային գնաճը փոխհատուցելու համար, որը հունիսին Գերմանիայում 8.2 տոկոսի է հասել։
Verdi-ն եւ Lufthansa-ն աշխատավարձի վերաբերյալ բանակցությունների արդեն երկու փուլ են անցկացրել: Երրորդը նախատեսված է օգոստոսի 3-ին եւ 4-ին։