Ամոթալի հիվանդությունից մինչև չարորակ ուռուցք. Զրույց բժշկի հետ

Աննա Անտոնյան Նոյեմբեր 28, 2021

Դրսում 21֊րդ դարն է, բայց արի ու տես, որ լուսավոր 21֊րդ դարում մեր իրականության մեջ մարդիկ սեփական  հիվանդությունների մասին բարձրաձայնել խուսափում են, իսկ եթե հիվանդությունը գոտկատեղից ներքև է գերադասում են արյունաքամ լինել, բայց ոչ երբեք դիմել բժշկի, կամ բժշկի են դիմում, երբ արդեն դանակը ոչ թե ոսկորին է հասել, այլ ոսկորն էլ է հատել։ 

Այսօր ամենա"ամոթով" հիվանդության` թութքի  մասին կխոսենք Աստղիկ բժշկական կենտրոնի վիրաբույժ, ԵՊԲՀ դասախոս, Հայկ Հարությունյանի հետ.

֊Ինչպե՞ս մարդը պետք է հասկանա, որ իր մոտ թութք է, որո՞նք են ախտանշանները։

-Թութքի ախտանշաններն են հետանցքի քորը, արտանկած հանգույցները, հետանցքի շրջանում դիսկոմֆորտը, երբեմն արյունային արտադրությունը և կղազատման դժվարացումը։

֊Ի՞նչ պետք է անի հիվանդը, բացի խուճապի մատնվելուց։

֊Բնականաբար խուճապի մատնվել պետք չէ։  Պետք է սթափ գիտակցել, եթե կա խնդիր պետք է անպայման դիմել մասնագետի։ 

֊Ի՞նչ տնական միջոցների պետք է հետևի հիվանդը մինչև բժշկին դիմելը։

֊Ընդհանրապես ցանկացած պարագայում ինքնաբուժությամբ, տնայնաբուժությամբ,  հարևանաբուժությամբ զբաղվելը ցանկալի չէ. միակ բանը, որ կարելի է անել սառը ջրով լվացումներն է և հիգիենայի պահպանումը մինչև բժշկին դիմելը։ 

֊Հնարավո՞ր  է արյան արտադրության նախանշանը այլ հիվանդություն լինի։ 

֊Հետանցքի շրջանում հաճախ լինում է թութք, ճաք, բայց երբեմն հանդիպում է նաև ուղիղ աղիքի ուռուցք, բնականաբար ճիշտ ախտորոշման համար պետք է դիմել բժշկի։

Չպետք է ինքնուրույն, կամ համացանցի միջոցով,  կամ հարևանին պատմելով նախանշանները,  սեփական ախտորոշումը կազմել, որպես թութք և սկսել տնական մոմիկներ ու յուղեր օգտագործել։  Ցանկացած առողջական խնդիր պետք է քննարկել միայն ու միայն մասնագետի հետ։ 

Մարմնում և օրգանիզմում չկա ամոթալի մասեր. չկա մարմնի մասեր, որոնց մասին խոսելը անհարմար է։  Անհարմար է չիմանալը,  անհարմար է ժամանակին բժշկի չգնալը, անհարմար է վտանգել հետագա կյանքը։ 

Շատ կարևոր է նաև, որ 40-50 տարեկանում մարդն առանց գանգատների 5 տարին մեկ անցնի կոլոնոսկոպիա։ Օրինակ հաստ աղու պոլիպը բարորակ գոյացություն է, բայց համարվում է նախաքաղցկեղ։ Հետևաբար մոտ 7֊12 տարվա ընթացքում այն կարող է դառնալ չարորակ ուռուցք։

֊Որպես ամփոփում ի՞նչ կավելացնենք։

֊Ամեն դեպքում կղանքում առկա արյունն ազդարարում է ձեր մարսողական տրակտի որևէ  կետի խնդրի մասին`  կերակրափողից մինչև հետանցք։

ՈՒղիղ աղու արյունահոսության ամենատարածված պատճառը թութքն է։ Սովորաբար թութքային արյունահոսությունն ի հայտ է գալիս դեֆեկացիայի վերջում և այն նկատվում է զուգարանի թղթի վրա:  

Թութքն ի հայտ է գալիս, երբ հետնանցքի և ուղիղ աղու երակները լայնանում և ուռչում են։  Պատճառների թվում են գիրությունը,  հղիությունը,  հաճախակի փորկապությունը:  

Արյունահոսության հետ մեկտեղ թութքն առաջացնում է քոր,  ցավ և գրգռում։  Եթե ​​ձեր սննդակարգից հանեք գրգռող կծու սննդամթերքը, ավելացնեք բջջանյութ,  ավելի շատ ջուր խմեք, խուսափեք երկար նստելուց և ավելի շատ մարզվեք,  ձեր վիճակը կարող է բարելավվել:  Որոշ քսուկներ կամ մոմիկներ օգտագործելը, թղթի փոխարեն ոչ տաք ջրով լվացումները կամ նստած լոգանքը նույնպես կարող են թեթևացնել իրավիճակը։  Սակայն միշտ պետք է հիշել`  ինքնաբուժությամբ չզբաղվել,  առաջին հերթին դիմել բժշկի ,  հետազոտվել,  ճիշտ ախտորոշվել, որից հետո հիվանդն ինքը  կորոշի բուժվել կոնսերվատիվ,  թե վերջնական արմատական վիրահատական եղանակով։

Զրուցեց` Արմինե Մելքոնյանը 

Կիսվել