Այս տարվա հոկտեմբերին կրկին ունեցել ենք աշխատատեղերի բացարձակ ռեկորդ. վարչապետ

Աննա Անտոնյան Դեկտեմբեր 03, 2025

«Այս տարվա հոկտեմբերին մենք կրկին ունեցել ենք բացարձակ, գրանցված և աշխատավարձով ապահովված աշխատատեղերի ռեկորդ»:

Այս մասին Ազգային ժողովի դեկտեմբերի 3-ի նիստին հայտարարել է ՀՀ վարչապետ Նիկոլ Փաշինյանը՝ խոսելով 2026 թվականի պետական բյուջեի վերջնական տարբերակի մասին:

«2025 թվականի հոկտեմբերին 810 հազար 074 գրանցված աշխատատեղ ունենք երկրում: 2018 թվականի նկատմամբ աճը՝ 223 հազար 895 կամ 38 տոկոս: Հարգելի՛ գործընկերներ, սա արձանագրում է, որ 2018-ից ի վեր մենք ՀՀ-ում ստեղծել ենք 223895 աշխատատեղ»,- նշել է վարչապետը:

Նրա խոսքով՝ նման ցուցանիշ նման ժամանակահատվածի համար Հայաստանի պատմության մեջ երբեք չի եղել, ընդ որում՝ աճը շարունակական է:

«Տարեցտարի 2024 թվականի հոկտեմբերի համեմատ 31 հազար աշխատատեղ է ստեղծվել 4 տոկոսով ավելի: Միջին աշխատավարձը հոկտեմբերին 313 հազար դրամ է, 2018 թվականի նկատմամբ աճը՝ 135657 դրամ կամ 76 տոկոս»,- նշել է վարչապետը:

Նրա խոսքով՝ շատ է խոսվում գնաճի մասին, իսկ իրականությունն այն է, որ Հայաստանում չի եղել 76-տոկոսանոց գնաճ:

«Եվ ընդհանրապես, մեր աշխատավարձերի աճերը երկնիշ են՝ 20 և ավելի տոկոս, ինչը ցույց է տալիս քաղաքացիների բարեկեցության մակարդակը: Եկամտային հարկը, որը հոկտեմբերին վճարվել է, եղել է 50 միլիարդ 699 միլիոն դրամ, որը 2018-ի հոկտեմբերի համեմատ համարյա կրկնակի ավելի է 95 տոկոսով՝ 24 միլիարդ դրամով»,- հայտնել է Փաշինյանը: 

Կիսվել