ԱՄՆ-ում պատրաստել են օրինագիծ Հունգարիայի դեմ պատժամիջոցների մասին՝ Ուկրաինայի պատճառով. FT
Աննա Անտոնյան Մարտ 27, 2026
ԱՄՆ սենատորներ Ջին Շահինը (դեմոկրատ, Նյու Հեմփշիր) եւ Թոմ Թիլիսը (հանրապետական, Հյուսիսային Կարոլինա) պատրաստել են օրինագիծ, որը պատժամիջոցներ կսահմանի հունգարացի բարձրաստիճան պաշտոնյաների նկատմամբ, հաղորդել է Financial Times-ը (FT):
Թերթի տեղեկացմամբ՝ օրինագիծը թիրախավորում է այն պաշտոնյաներին, ովքեր խոչընդոտել են Ուկրաինային «պատերազմական վարկի» տրամադրմանը: Եթե այն ընդունվի, ԱՄՆ-ը ֆինանսական պատժամիջոցներ կկիրառի Հունգարիայի նկատմամբ եւ կարգելի վիզաներ տրամադրել հունգարացի բարձրաստիճան պաշտոնյաներին, որոնք կողմ են Կիեւին աջակցությունը դադարեցնելուն:
«Եթե մենք ցանկանում ենք վերջ դնել հակամարտությանն Ուկրաինայում, Թրամփի վարչակազմը պետք է հետեւողականորեն նույն չափանիշները կիրառի մեր դաշնակիցների նկատմամբ: Ոչ ոք, հատկապես Հունգարիայի վարչապետ Վիկտոր Օրբանը, չպետք է արտոնյալ վերաբերմունք ստանան»,- թերթը մեջբերել է Շահինի խոսքերը:
Նշվել է, որ վերանայված օրինագծի մեջ, որին ծանոթացել է FT-ն, Օրբանը չի նշվում որպես պատժամիջոցների թիրախ։ Թրամփի վարչակազմը կորոշի, թե որ հունգարացի պաշտոնյաներն են ներգրավված «Ուկրաինային օգնության ուշացման» մեջ։
Մարտի 19-ին, Կիեւի կողմից ռուսական նավթի տարանցման կասեցմանն ի պատասխան, Հունգարիայի վարչապետը եւ նրա սլովակ գործընկեր Ռոբերտ Ֆիցոն արգելափակեցին Ուկրաինային 90 միլիարդ եվրոյի «պատերազմական վարկի» տրամադրումը եւ Ռուսաստանի դեմ պատժամիջոցների 20-րդ փաթեթի հաստատումը ԵՄ գագաթաժողովում։ Ինչպես նշվել է Բրյուսելի հանդիպման հայտարարության մեջ, այդ միջոցները, որոնք պահանջում էին կոնսենսուս, աջակցվել են ԵՄ 27 երկրներից 25-ի կողմից, եւ, հետեւաբար, «Եվրոպական խորհուրդը կվերադառնա այս հարցին իր հաջորդ նիստում»։