ԱՄՆ-ն կարող է զրկվել մատչելի օտարերկրյա մեքենաներից՝ Կանադայի և Մեքսիկայի հետ համաձայնության չգալու դեպքում․ WSJ
Աննա Անտոնյան Ապրիլ 28, 2026
Մի քանի համաշխարհային ավտոարտադրողներ քննարկում են ամերիկյան շուկայում իրենց բյուջետային մոդելների վաճառքից հրաժարվելու հնարավորությունը, եթե Միացյալ Նահանգները չկարողանա երկարաձգել Մեքսիկայի և Կանադայի հետ առևտրային համաձայնագիրը, հաղորդում է The Wall Street Journal-ը (WSJ):
Պարբերականի տեղեկություններով՝ մի քանի ավտոհսկաներ արդեն տեղեկացրել են ԱՄՆ վարչակազմին, որ կդադարեցնեն իրենց ամենամատչելի մոդելների վաճառքը, եթե Վաշինգտոնը որոշի չերկարաձգել Կանադայի, Մեքսիկայի և ԱՄՆ-ի միջև եռակողմ առևտրային համաձայնագիրը (USMCA) կամ համաձայնության չգա երեք երկրների միջև առևտրի այլ արտոնյալ պայմանների շուրջ։
The Wall Street Journal-ը նկատում է, որ այնպիսի ընկերություններ, ինչպիսիք են ճապոնական Nissan-ը, Toyota-ն և հարավկորեական Hyundai-ն, շարունակում են ամերիկացի սպառողին առաջարկել փոքր ու մատչելի մեքենաներ, մինչդեռ ամերիկյան ավտոհսկաները վերջին տարիներին հրաժարվել են նմանատիպ մոդելներից։ Թեև օտարերկրյա արտադրողներն իրենց բյուջետային որոշ մոդելներ հավաքում են հենց ԱՄՆ-ում, նրանք խիստ կախված են Մեքսիկայից և Կանադայից մատակարարվող պահեստամասերից։ Եթե նախկինում USMCA համաձայնագրով այդ բաղադրիչները չէին հարկվում, ապա Դոնալդ Թրամփի վարչակազմի սակագնային փոփոխություններից հետո դրանց մաքսատուրքը հասել է 25%-ի։ Ծախսերի նման կտրուկ աճն էլ ստիպում է ընկերություններին քննարկել ամերիկյան շուկայում էժան մեքենաների վաճառքը դադարեցնելու հարցը։
Ինչպես նշում է պարբերականը, ԱՄՆ-ում ամենամատչելի 10 ավտոմեքենաներից 8-ն արտադրվում են արտասահմանյան ընկերությունների կողմից։ Ընդ որում՝ այդ ցուցակի մյուս երկու մոդելները ամերիկյան General Motors ավտոհսկան արտադրում է Կորեայի Հանրապետությունում։