Ադրբեջանական անձնակազմով խորհրդավոր նավ է խորտակվում Սև ծովում. Լրատվամիջոց
Աննա Անտոնյան Օգոստոս 28, 2023
Ռումինիայի ափերի մոտ Սեւ ծովում խորտակվելու վտանգի տակ է Տանզանիայի դրոշով առեղծվածային բեռնատար նավը։ Ռումինական աղբյուրների համաձայն, AMANOS-ի անձնակազմի անդամների թվում կա Ադրբեջանի վեց և Թուրքիայի երկու քաղաքացի։ Այս մասին գրում է Haqqin.az-ը։
«AMANOS-ը SOS ազդանշան է ուղարկել Ռումինիայի Մանգալիա քաղաքից 1,5 ծովային մղոն հեռավորության վրա: Նավի անձնակազմը օգնության խնդրանքով դիմել է Ռումինիայի առափնյա անվտանգության ծառայությանը՝ ասելով, որ նավի քթի հատվածը կոտրվել է, և ջուրը ներս է լցվել։ Ռումինական «Ֆենիքս», «Բրիսո» և «Տեյա» փրկարար նավերն անմիջապես մեկնել են նավի տեղակայման վայր։
Սակայն AMANOS-ի նավապետը թույլ չի տվել ռումինացի փրկարարներին բարձրանալ իր նավը, հրաժարվել է օգնությունից և հայտարարել, որ անձնակազմն ինքնուրույն կվերականգնի վնասը, այնուհետև նավարկել դեպի ծով՝ դեպի բուլղարական ջրեր։ Թե ինչ բեռ էր տեղափոխում նավը, հայտնի չէ։
Marinetraffic կայքը նշում է, որ այս բեռնատար նավը կառուցվել է 1978 թվականին, նավի ներկայիս սեփականատիրոջ մասին տեղեկությունները գաղտնի են։ Օգոստոսի 14-ին նավը լքել է Ուկրաինայի Օդեսայի մարզի Իզմայիլ նավահանգիստը, սակայն վերջնական նպատակակետը չի նշվում»,- հայտնել են լրատվամիջոցները։